Samsung smartfonlardagi periskopik kamerani yaxshiladi. ALoP (All Lenses on Prism) texnologiyasi taqdim etildi

Samsung tasvirlarni qayta ishlash bo‘yicha mutaxassislar jamoasi yorqinroq obyektivdan (80 mm da F/2,58) foydalanish va korpusning umumiy qalinligini kamaytirish imkonini beruvchi yangi yig‘ma teleobyektiv modulini ishlab chiqdi.

ALoP (All Lenses on Prism) deb nom olgan texnologiya, mohiyatan, an’anaviy yig‘ma konstruksiyadagi kabi prizma va tasvir datchigi o‘rtasida emas, balki periskop prizmasi ustidagi linza matritsasini harakatlantiradi.

Buning sababi shundaki, yig‘ma teleobyektivning tipik konstruksiyasida obyektiv diametrining oshishi (bu uni yorqinroq qiladi) modul balandligining oshishiga olib keladi. ALoP texnologiyasi bilan butun modulni kattalashtirmasdan kengroq obyektiv olish mumkin. Shunday qilib, ALoP tufayli periskopik kameralar yorqinroq linzalarga ega bo‘lishi mumkin, bu esa kuchsiz yorug‘lik sharoitida yaxshiroq natijani ta’minlaydi.

Samsung ISOCELL ishlab chiquvchilar jamoasining ta’kidlashicha, bu konstruksiya oddiy periskopdan 22% qisqa va 40° ga qiya prizmatik qaytaruvchi sirt va 10° ga qiya sensor tugunidan foydalanadi.

Samsung ushbu texnologiya Galaxy S25 seriyasida qo‘llanilishi yoki qo‘llanilmasligi haqida ma’lumot bermadi.