Tesla aksiyalari pasaymoqda, yanvar oyida sotuvlar quladi. Ehtimol, bunga Ilon Maskning o‘zi aybdordir

CNBC ma’lumotlariga ko‘ra, Ilon Maskning radikal fikrlari va siyosiy faoliyati Tesla brendi qiymati va obro‘sining pasayishiga olib keldi. Brand Finance konsalting kompaniyasi ma’lumotlariga ko‘ra, Tesla brendi qiymati 2024-yilda 26 foizga pasaygan.

Electrek ma’lumotlariga ko‘ra, joriy yilning yanvar oyida Tesla sotuvi Buyuk Britaniyada yillik hisobda 18 foizga, Portugaliyada 31 foizga, Daniya, Shvetsiya, Norvegiya va Niderlandiyada taxminan 40 foizga, Fransiyada 63 foizga va Ispaniyada 75 foizga kamaydi.

Dushanba kuni Tesla aksiyalari narxi taxminan 5% ga tushib, har bir aksiya uchun 383,68 AQSH dollari darajasida yopildi. Bungacha AQSH prezidenti Tramp Kanada, Meksika va Xitoydan keltirilgan tovarlarga bojlar joriy etilishini e’lon qilgan edi. Bundan tashqari, Fransiya, Shvetsiya va Norvegiyada transport vositalarini ro‘yxatdan o‘tkazish sonining kamayishi Tesla aksiyalari narxiga salbiy ta’sir ko‘rsatdi.

Dam olish kunlari Tramp Xitoydan import uchun 10 foizlik boj joriy etilishini e’lon qildi, u yerda Tesla o‘z avtomobillarining yarmini ishlab chiqaradi. Garchi tariflar barcha avtomobil ishlab chiqaruvchilarning ta’minot zanjirlariga ta’sir qilishi mumkin bo‘lsa-da, Tesla AQSH, Berlin va Shanxayda zavodlariga ega, bu unga boshqa elektromobil ishlab chiqaruvchilar duch keladigan ba’zi muammolardan qochish imkonini beradi.

O‘tgan hafta Tesla moliyaviy direktori Vaybxav Tanedja daromad hisobotida yangi hukumat tarif siyosatini joriy qilsa, bu kompaniyaning daromadliligiga ta’sir qilishi mumkinligini aytdi. U shunday dedi: "Ko‘p yillar davomida biz har bir bozorda ta’minot zanjirimizni mahalliylashtirish ustida tinimsiz ishladik, ammo bizning biznesimiz hali ham butun dunyo bo‘ylab komponentlarga bog‘liq." Shuningdek, u tariflarning joriy etilishi kompaniya faoliyatiga ta’sir qilishini ta’kidladi.